相信好多女士們一M到都會出現唔同程度嘅M痛，無論係間歇性咁陰住陰住痛，定痛到翻天覆地返唔到工都好，為咗自己身體著想，點都要有一招半招舒緩M痛嘅絕招防身先得，乖乖哋照住做，一定可以幫你減少M到時所受嘅痛苦！

第一招 謝絕凍飲

如果本身有手足冰冷問題嘅話，嗜飲凍飲就更加係經痛嘅元凶！想舒緩經痛，除咗喺經期期間唔好掂凍飲之外，平時亦都應該盡量少飲凍飲。覺得難戒嘅話，可以先由少冰、走冰做起，慢慢培養習慣，咁M到嘅時候就冇咁辛苦啦！

第二招 敷暖水袋

由於經痛係子宮收縮引起，呢個時候用暖水袋甚至暖包熱敷就可以有助放鬆肌肉，改善血液循環，令到經痛冇咁犀利。用嘅時候記得將暖水袋或者暖包放喺下腹覺得痛嘅位置，而且為免燙傷，記得唔好直接將暖包或者暖水袋就咁貼住皮膚，記得用暖蛋殼或者專用嘅袋裝一裝住佢先，咁就唔怕會無意中燙傷肌膚啦！

第三招 按摩穴位

如果臨急臨忙搵唔到暖水袋嘅話，亦都可以試下按摩穴位，都有助舒緩M痛。首先介紹嘅係血海穴，喺大腿內側近膝頭嘅骨頭位置對上2寸左右，大腿內側肌隆起嘅地方就係啦。另一個穴位就可以試下合谷穴，合谷穴就喺手掌虎口位置，用手指喺以上2個穴位按5-10分鐘就得，如果喺M到前1星期就開始按，更加可以有效預防劇烈嘅經痛添！

第四招 攝取維他命

平時攝取足夠嘅維他命亦都可以有助舒緩經痛，例如維他命B1同維他命E。最方便當然係食綜合維他命，一次過滿足身體所需嘅維生素啦！如果平時經痛問題好嚴重嘅話，亦都可以試下食魚油，經研究證明係有效減輕經痛！

第五招 適量運動

平時做適量嘅運動，亦都有助減輕經期時嘅痛楚，而且經期時亦都唔使剩係瞓同坐，簡單去做下慢跑、瑜珈等冇咁劇烈嘅運動亦都可以幫助放鬆身心，令到M 痛可以有效咁舒緩，所以M到時記得唔好畀藉口自己，要郁動下身體啦。

不過若長期都有經痛問題，最好諮詢醫生。